18-03-2017
Azərbaycan Respublikasının Prezidenti İlham Əliyev Novruz bayramı münasibətilə ümumxalq şənliyində iştirak edib

Bakıda Azərbaycan xalqının milli bayramı - Novruz münasibətilə ümumxalq şənliyi keçirilib. Azərbaycan Respublikasının Prezidenti İlham Əliyev, birinci xanım Mehriban Əliyeva və Heydər Əliyev Fondunun vitse-prezidenti Leyla Əliyeva Novruz şənliyində iştirak ediblər.

24-02-2017
Dövlət Bayrağı Muzeyində 26 Fevral Xocalı Soyqırımı ilə bağlı anım tədbiri

AR Nazirlər Kabineti yanında Dənizkənarı Bulvar İdarəsi tərəfindən Dövlət Bayrağı Muzeyində 26 Fevral Xocalı Soyqırımı ilə bağlı anım tədbiri keçirilmişdir. İdarənin Aparat rəhbəri Elmir Bağırov Xocalıda baş vermiş hadisənin erməni millətçi ünsürlərinin azərbaycanlılara qarşı həyata keçirdiyi kütləvi qırğın aksiyası olduğunu vurğulamışdır. Daha sonra İdarəsinin Kommunal xidmət, təmir və dənizkənarı bulvar ərazisinin mühafizəsi müəssisəsinin direktoru Rəfail Niftəliyev, muzeyin elmi işçisi Türkan Mehdiyeva çıxış etmişlər. Tədbirin sonunda faciə ilə bağlı film nümayiş edilmişdir.

25-01-2017
Azərbaycan Respublikasının Nazirlər Kabineti yanında Dənizkənarı Bulvar İdarəsinin mühafizə xidmətinin əməkdaşları mükafatlandırılmışdır

24 yanvar 2017-ci il tarixində Azərbaycan Respublikasının Nazirlər Kabineti yanında Dənizkənarı Bulvar İdarəsinin Kommunal xidmət, təmir və dənizkənarı bulvar ərazisinin mühafizəsi müəssisəsinin mühafizə xidmətinin əməkdaşları Ramazan Nadir oğlu Mehdiyev və Mehrac İlqar oğlu Şahvələdli İdarə rəhbərliyi və İdarə Həmkarlar Komitəsi tərəfindən mükafatlandırılmışdır. Mükafatlandırma adları qeyd olunan əməkdaşların Dənizkənarı Bulvar ərazisində özünü dənizə ataraq intihar etməyə cəhd göstərmiş şəhər sakininin xilas etməsi ilə bağlıdır. Mühafizə xidmətinin əməkdaşları küləkli və soyuq havada həyatlarını təhlükəyə ataraq öz vətəndaşlıq borcunu yerinə yetirmişlər. Dənizkənarı Bulvar İdarəsi tərəfindən xidmətdə fərqlənən əməkdaşlar daima diqqət mərkəzində saxlanılır və müvafiq qaydada mükafatlandırılır.

19-01-2017
Azərbaycan Respublikasının Nazirlər Kabineti yanında Dənizkənarı Bulvar İdarəsi tərəfindən 20 Yanvar faciəsinin 27-ci ildönümü ilə bağlı anım tədbiri keçirilmişdir

19 yanvar 2017-ci il tarixində Azərbaycan Respublikasının Nazirlər Kabineti yanında Dənizkənarı Bulvar İdarəsi tərəfindən 20 Yanvar – Ümumxalq Hüzn günü ilə bağlı Dövlət Bayrağı Muzeyində anım tədbiri keçirildi. Tədbir iştirakçıları 1990-cı il 20 yanvar gecəsində azadlıq və suverenlik uğrunda canından keçmiş şəhidlərimizin əziz xatirəsini bir dəqiqəlik sükutla yad edildi.  Tədbirdə çıxış edən İdarənin Aparat rəhbəri Elmir Bağırov qeyd etdi ki, Azərbaycanın dövlətçilik tarixində 20 Yanvar günü, böyük faciə ilə yanaşı, xalqımızın milli müstəqillik, Vətənimizin azadlığı uğrunda mübarizə ruhunun və yenilməz iradəsinin rəmzinə çevrilib. Azərbaycanın taleyi, hətta xəritədəki varlığı şübhə altında olduğu bir vaxt bu səsi ilk olaraq ümummilli lider Heydər Əliyev ucaltdı, qanlı cinayətin təşkilatçılarını qəzəblə ittiham etdi, törədilən hadisənin hüquqa, demokratiyaya, humanizmə zidd hadisə olduğunu deyib. Digər natiqlər də faciə ilə bağlı öz fikirlərini bildirdilər və bu ağır günlərdə xalqımızın nümayiş etdirdiyi birliyin, şəhidlərimizin qəhrəmanlığının gənclər üçün nümunə olduğunu qeyd etdilər.  Tədbirin sonunda 20 Yanvar hadisələrinə həsr olunmuş sənədli film nümayiş olundu.

30-12-2016
Dünya Azərbaycanlılarının Həmrəyliyi və Yeni il münasibəti ilə Milli parkda atraksionlardan, qatarlardan və gəmi gəzintisindən pulsuz istifadə aksiyası keçirilmişdir.

    Bu gün Azərbaycan Respublikasının Nazirlər Kabineti yanında Dənizkənarı Bulvar İdarəsi tərəfindən Dünya Azərbaycanlılarının Həmrəyliyi və Yeni il münasibəti ilə Milli parkda atraksionlardan, qatarlardan və gəmi gəzintisindən pulsuz istifadə aksiyası təşkil edilmişdir. Yaşı 15-ə qədər olan uşaqlara səhər saat 10:00-dan 14:00-dək bulvardakı atraksionlardan, qatarlardan və sərnişin gəmisindən pulsuz istifadə haqqı verilmişdir. Aksiyada bütövlükdə 15 mindən çox insan iştirak etmiş və aksiyadan yararlanmışlar. Ümumilikdə aksiyada 4 qatardan, “Qorxulu Ev”, “Sinema 7D”, “Kosmos”, “Uçan boşqab”, “Pirat”, ”Möcüzələr dünyası”, “Qüllə” adlı atraksionlardan, 2 avtodrom, uşaq povliyonu, 2 karnavaldan və 1 “Mirvari” gəzinti gəmisi istifadə olunmuşdur.Aksiyada vətəndaşların təhlükəsizliyinin təmin olunması məqsədilə İdarə əməkdaşları gücləndirilmiş iş rejimində fəaliyyət göstərmiş və tədbir uğurla reallaşmışdır. Dənizkənarı Bulvar İdarəsi tərəfindən gələcək də bu tipli sosial aksiyaların həyata keçirilməsi nəzərdə tutulur.