29-09-2017
Dənizkənarı Milli Parkda boççia idman növü üzrə yarışı keçirilib

Dənizkənarı Milli Parkın Azneft dairəsinə doğru hissəsində yaşıl xalını xatırladan banderin ətrafında qələbəlik idi. Buraya əlil arabasında əyləşmiş idmançılarla yanaşı, onların valideynləri, qohumları, hökumət və qeyri-hökumət təşkilatlarının nümayəndələri, eləcə də gənclər və tələbələr toplaşmışdı. Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Fondunun yardımı ilə “Arabaçı” Əlillər Şəbəkəsi İctimai Birliyinin təşkil etdiyi tədbirə xeyli tamaşaçı toplaşmışdı. Tədbir gənc nağaraçıların ifa etdikləri ritm nömrələrindən sonra başlanıb… Fiziki məhdudiyyətli insanların reabilitasiyası və cəmiyyətə inteqrasiyası layihəsi çərçivəsində keçirilən tədbiri İctimai Birliyin sədri İlham Məhərrəmov açıb. O, çıxışında rəhbərlik etdiyi birliyin sağlamlıq imkanı məhdud olanların özünə qapanmaması, cəmiyyətə inteqrasiyası məqsədilə yaradıldığını və onlara dəstək olacaqlarını söyləyib. Qeyd olunub ki, ölkəmizdə 535 min fiziki məhdudiyyətli insan var, onlardan 25 mini daha ağır vəziyyətdədir. “Arabaçı” onların bir hissəsini paralimpiya idman növü olan boççia ilə məşğul olmağa həvəsləndirib. Əmək və əhalinin sosial müdafiəsi nazirinin müavini, Milli Paralimpiya Komitəsinin Prezidenti İlqar Rəhimov son illər əlil idmançılar arasında boççia idman növünün yayılması sahəsində xeyli iş görüldüyünü söyləyib. Nazir müavinin dediyinə görə, indi bu idman növü nəinki paytaxtda, hətta bölgələrdə də özünə xeyli tərəfdar tapır. Üstəlik, boççia ilə təkcə böyüklər deyil, uşaqlar arasında da xeyli məşğul olan var. Əlil idmançılar onunla az vaxtda məşğul olmasına baxmayaraq, bu yaxınlarda Minsk şəhərinə təlim-məşq toplanışına yola düşəcək və orada həmin ölkədən olan həmkarları ilə yoldaşlıq görüşündə qüvvələrini sınayacaqlar. Əlillər Təşkilatları İttifaqının sədri Davud Rəhimli və digər çıxış edənlər təşəbbüsü təqdir edib, əlil idmançıların cəmiyyətə inteqrasiyası sahəsində həyata keçirilən tədbirə uğurlar arzulayıblar. Gənc rəqqasların ifa etdikləri nömrələrdən sonra yığma komanda üzvlərinin iştirakı ilə boççia yarışına start verilib. Yaşıl xalı üzərində qızğın yarış başlanıb. Əlil idmançılar göy və qırmızı topları meydanın mərkəzində qoyulmuş cekə-ağ topa doğru atırdılar. Oyun getdikcə qızışır, tamaşaçılar onları alqışlayırdılar. Heç kim uduzmaq istəmirdi. İdmanın gözəlliyi də elə bundadır...

24-09-2017
“Xəzərin sahilində” adlı musiqi festivalına start verilib

Sentyabrın 23-də Dənizkənarı Milli Parkda Azərbaycan Respublikasının Prezidenti yanında Gənclər Fondu və “Cavan” Gənclər Hərəkatı İctimai Birliyinin birgə təşkilatçılığı ilə “Xəzərin sahilində” adlı musiqi festivalına başlanılıb.  Festivala müxtəlif janrlarda çıxış edən iyirmidən artıq ifaçı və qrup qatılıb. Azərbaycanda ilk dəfə keçirilən küçə musiqisi festivalı üçün Dənizkənarı Milli Parkda xüsusi yerlər ayrılıb. İki gün davam edəcək festivalda ifaçılar öz repertuarlarını təqdim edəcəklər. Tədbirin ən maraqlı məqamlardan biri - səhnələrdən birinin boş saxlanılaraq, arzu edən hər kəsə burada ifa etmək imkanının yaradılması olacaq. Festivalda Azərbaycanın tanınmış müğənnilərinin iştirakı, müxtəlif səhnə şoularının təşkili də nəzərdə tutulur. Festivalın məqsədi Bakıda küçə musiqiçilərinə münasibəti daha da yaxşılaşdırmaq, gəncləri musiqi ətrafında toplayaraq onların vaxtının xoş keçməsinə nail olmaqdır.

23-09-2017
Bakıda Ümumdünya Avtomobilsiz Gününə həsr olunmuş veloyürüş keçirilib

Ümumdünya Avtomobilsiz Günü (World Carfree Day) münasibətilə sentyabrın 22-də Heydər Əliyev Mərkəzi, IDEA İctimai Birliyi və Azərbaycan Velosiped İdmanı Federasiyasının təşkilatçılığı, Bakı Nəqliyyat Agentliyinin dəstəyi ilə Bakıda maarifləndirmə xarakterli kütləvi aksiyalar təşkil edilib. Tədbir çərçivəsində əvvəlcə “İş yerinə velosipedlə!” şüarı altında veloyürüş keçirilib. İki yüzdən çox velosipedçi, skeytbordçu və rollerin qatıldığı yürüşün əsas məqsədi insanlar arasında davamlı və ekoloji təmiz nəqliyyat növlərindən, ictimai nəqliyyatdan istifadəni, eləcə də piyada gəzməyi təbliğ etmək, nəticədə atmosferə atılan tullantıların azaldılmasına töhfə verməkdir. “Azneft” dairəsindən başlayan veloyürüş Heydər Əliyev Mərkəzində başa çatıb.

12-09-2017
Hindistanın məhşur ‘INDIAN OCEAN’ qrupu Bakı bulvarında

Azərbaycanda qastrol səfərində olan Hindistanın ən qabaqcıl qrupu “Indian Ocean” (Hind Okeanı) Bakıda bulvarda konsert proqramı ilə çıxış edib. “Indian Ocean” qrupunun üzvü Rahul Ram bu qrupun Hindistandan Azərbaycana qastrol səfəri etmiş ilk əsas qrup olduğunu vurğulayıb. Qrup Bakının gözəlliyi və burada insanların müsbət enerjisindən təsirləndiklərini qeyd edib. Onlar həmçinin, Azərbaycandakı musiqi dünyasını təqdir etdiklərini də ifadə ediblər. “Indian Ocean” qrupu öz nadir musiqisi ilə Hindistanda və ölkə xaricində böyük coşqu yaradıb və uğur qazanıb. Bəzi tənqidçilər “Indian Ocean”qrupunun musiqisini mənəviyyat, fəallıq, ətrafmühitçilik, müharibənin faydasızlığı və mifologiya kimi mövzuları özündə ehtiva edən müasir rokun, klassik Hind cazının, xalq musiqisinin vəhdəti kimi təsvir edirlər. “Indian Ocean” musiqi qrupunun səfəri Hindistanla Azərbaycan arasında diplomatik münasibətlərin qurulmasının 25-ci ildönümünə həsr olunmuş tədbirlərin tərkib hissəsini təşkil edir. Tədbirin təşkilatçıları olan Hindistanın Mədəni Əlaqələr Şurası (ICCR) və Hindistanın Azərbaycandakı Assosiasiyası (IAA) Azərbaycan musiqi sevərlərini hər kəsə açıq olan konsert proqramlarından zövq almağa dəvət edib.

11-09-2017
Dənizkənarı Milli Parkda İndoneziya mədəniyyəti festivalı çərçivəsində "Fun walk" yürüşü keçirilib

Sakit və Hind okeanının sularına səpələnmiş adalarda qərar tutmuş uzaq İndoneziya ilə sıx siyasi-mədəni əməkdaşlığımız ölkəmiz müstəqilliyini bərpa etdikdən sonra başlayıb. İki dövlət arasında diplomatik münasibətlərin qurulmasından 25 il keçir. Bu münasibətlə sentyabrın 9-10-da dost ölkənin Azərbaycandakı səfirliyinin təşəbbüsü ilə Bakıda II İndoneziya mədəniyyəti festivalı keçirildi. Xatırladaq ki, ilk belə festival 2016-cı ilin noyabr ayında gerçəkləşdirilmişdir. Festival çərçivəsində sentyabrın 10-da Dənizkənarı bulvarda bazar günü günortadan sonra yolu buradan düşən bakılılar və şəhərimizin qonaqları qədim, bir neçə mədəniyyətin qovuşuğundan formalaşmış İndoneziya mədəniyyəti ilə ünsiyyət şansı qazandı. «Fun walk» yürüşünə qoşulanlar tədbir iştirakçıları ilə birgə mahnı oxudular, rəqs etdilər. Hətta bu yürüşə seyrçi qalanlar belə özləri ilə bulvardakı bu qeyri-adi görüşdən evinə ürəkdolusu İndoneziya sevgisi apardılar. 

23-07-2017
Dənizkənarı Milli Parkda Yoqa Festivalı keçirilib

YARAT Müasir İncəsənət Məkanı Azərbaycan Respublikasının Nazirlər Kabineti yanında Dənizkənarı Bulvar İdarəsi ilə birgə "YARAT Freestyle" proqramı çərçivəsində 23 iyul tarixində Bayıl Bulvarı-Su İdman Sarayının yaxınlığında açıq havada iri miqyaslı yoqa festivalı günü təşkil etmişdir. Festivalın başlıca məqsədi – sağlam həyat tərzini təbliğ etməkdir. Festival səhər saat 10:00-da açıq səma altında kütləvi yoqa məşqləri ilə başladı. Gün ərzində yoqa sevərlər bir çox müxtəlif tədbirlərdə iştirak etdilər.Festivalın iştirakçıları "Yoga Shahi" studiyası, "The Art Of Living" Beynəlxalq Fondu, "Chandramukhi" Hind rəqs studiyası və "Sevimli bala" uşaq təşkilatıdır. Tədbir zamanı Xəzər dənizi sahilində yaşıl qazon üzərində, peşəkar müəllimlər ilə birgə yoqa məşqləri, uşaqlar üçün ustad dərsləri, FLY yoqa tədbirləri keçirilmişdir. Tədbir saat 18:00-da yekunlaşmışdır.