11-12-2018
Bakı Bulvarına Dənizkənarı Milli Park statusu verilməsinin 20-ci ildönümü ilə bağlı “Dənizkənarı Milli Park fotoqrafların gözü ilə” adlı fotomüsabiqə

Bakı Bulvarına Dənizkənarı Milli Park statusu verilməsinin 20-ci ildönümü ilə bağlı “Dənizkənarı Milli Park fotoqrafların gözü ilə” adlı fotomüsabiqə. Dənizkənarı Bulvar İdarəsi Ümummilli Lider Heydər Əliyevin fərmanı ilə Bakı Bulvarına Dənizkənarı Milli Park statusu verilməsinin 20-ci ildönümünə həsr olunan “Dənizkənarı Milli Park fotoqrafların gözü ilə” adlı fotomüsabiqə elan edir. Müsabiqənin tarixi: İştirakçı qeydiyyatı və fotoşəkillərin qəbulu Başlanma: 11.12.2018 Bitmə: 04.11.2019 Müsabiqənin şərtləri: Müsabiqədə yaşından asılı olmayaraq Azərbaycan Respublikası, eləcə də xarici ölkə vətəndaşları olan həvəskar və peşəkar fotoqraflar iştirak edə bilər. Müsabiqəyə təqdim olunan fotolar office@bulvar.gov.az elektron ünvanına göndərilməlidir. Hər iştirakçı müsabiqəyə 3 foto təqdim edə bilər. Hər bir müəllif foto ilə bərabər özü haqda məlumatı (ad, soyad, fotonun adı, telefon nömrəsi) göndərməlidir. Fotolar JPG formatda, uzunluğu 1500 px olmalıdır. Təqdim olunan fotoların üzərində heç bir müəllif imzası və ya loqosu yerləşdirmək olmaz. Fotolar üzərində heç bir fotoredaktə proqramlarında əlavələr olunmamaq şərti ilə real rəng, kontrast və s. kimi alətlərdən istifadə olunması mütləqdir. Fotolarda Dənizkənarı Milli Parkın görünüşü, atributları, bulvar ərazisindəki maraqlı mənzərələr və s. əks olunmalıdır. Fotolarda əks olunmuş şəxslərin razılığına görə məsuliyyət fotoqrafın üzərinə düşür. Fotolardan istifadə hüququ müəllif hüquqları qorunmaq şərti ilə Dənizkənarı Bulvar İdarəsinə məxsus olacaq. Fotolardan kommersiya məqsədi ilə istifadə olunmayacaq.    Münsiflər tərəfindən seçilmiş fotolara 1 yer üçün 1500 AZN. 2 yer üçün 1000 AZN. 3 yer üçün 500 AZN Pul mükafatı təqdim olunacaq. Mobil telefonlarla çəkilən fotolar müsabiqənin "Mobiloqrafiya" bölməsində qəbul olunur. Mobil telefonlarla çəkilmiş fotolar Bulvaridare@gmail.com elektron ünvanına göndərilməlidir. Hər bir iştirakçı yalnız 2 foto təqdim edə bilər. Münsiflər heyətinin "Mobiloqrafiya" bölməsindəki fotolar arasından seçdiyi 20 şəkil arasından qalib instaqramda səs vermə yolu ilə müəyyənləşəcək. Qaliblərə 1 yer üçün 300 AZN 2 yer üçün 200 AZN 3 yer üçün 100 AZN Pul mükafatı təqdim ediləcək. Dənizkənarı Bulvar ərazisində müsabiqəyə təqdim olunan ən yaxşı fotolardan ibarət sərginin təşkili, fotolarla bağlı məlumat kataloqunun hazırlanması da planlaşdırılır.   Təşkilati dəstək Azərbaycan Fotoqraflar Birliyi   Müsabiqənin koordinatoru: Nicat Abdullayev elektron ünvan: nicat.abdullayev@bulvar.gov.az tel: +994 55 310 96 40    

09-11-2018
Dənizkənarı Bulvar İdarəsi 9 Noyabr Bayraq Günü ilə əlaqədar aksiya keçirib

Dənizkənarı Bulvar İdarəsi 9 Noyabr Bayraq Günü ilə əlaqədar aksiya keçirib. “Üçrəngli bayrağınla məsud yaşa”! devizi altında keçirilən aksiyada bulvara gələn insanlara müxtəlif ölçülü bayraqlar, üzərində üçrəngli bayraq əks olunan nişanlar hədiyyə olunub. Aksiyanı keçirməkdə məqsəd Azərbaycanın azadlığının, suverenliyinin simvolu, xalqın qürur mənbəyi olan dövlət bayrağının təbliğ olunması, xüsusən yetişməkdə olan gənc nəslə bayrağa sevgi və hörmət hissini aşılamaqdır. Aksiya çərçivəsində bulvara gələn insanlara 5 mindən çox müxtəlif ölçülü bayraq və üzərində bayraq əksi olan nişanlar təqdim olunub.

08-11-2018
Dənizkənarı Bulvar İdarəsi 9 Noyabr Dövlət Bayrağı Günü münasibətilə videoçarxı təqdim edir

Dənizkənarı Bulvar İdarəsi 9 Noyabr Dövlət Bayrağı günü münasibətilə hazırladığı videoçarxı təqdim edir. Videoçarxda Azərbaycanın suverenliyinin simvolu olan dövlət bayrağının əhəmiyyəti vurğulanır. Layihənin reallaşdırılmasında məqsəd gənc nəsildə bayrağa sevginin və hörmətin aşılanmasıdır. Videoçarx Azərbaycan Televiziyası, İctimai Televiziya və digər media orqanlarında nümayiş olunacaq. Noyabrın 9-da seanslardan əvvəl kinoteatrlarda və paytaxtın müxtəlif nöqtələrində yerləşən monitorlarda yayımlanacaq. Layihənin çəkiliş Bakı Media Mərkəzi tərəfindən həyata keçirilib.

08-11-2018
Bakıda "BakıFilEkspo" V Milli Filateliya sərgisi açılıb

Nəqliyyat, Rabitə və Yüksək Texnologiyalar Nazirliyi, "Azərmarka" MMC və Azərbaycan Filatelistlər İttifaqının təşkilatçılığı ilə noyabrın 8-də Xalça Muzeyində "BakıFilEkspo" V Milli Filateliya sərgisinin açılışı olub. Sərgidə nəqliyyat, rabitə və yüksək texnologiyalar nazirinin müavini Elmir Vəlizadə, Dənizkənarı Bulvar İdarəsi İdarə Heyəti sədrinin müavini  Elşən İsgəndərov, "Azərmarka" MMC-nin direktoru Leyla Güləliyeva, Azərbaycan Filatelistlər İttifaqının sədr müavini Rövşən Əhmədov, filatelistlər, numizmatlar və digər kolleksiyaçılar iştirak edib. AZƏRTAC xəbər verir ki, nəqliyyat, rabitə və yüksək texnologiyalar nazirinin müavini Elmir Vəlizadə Azərbaycan Dövlət Bayrağının 100 illiyi kimi əlamətdar günün astanasında belə tədbirin keçirilməsinin xüsusi əhəmiyyət daşıdığını qeyd edib. Bildirib ki, 2018-ci il Azərbaycan üçün əlamətdar hadisələrlə zəngin olub. Azərbaycan Xalq Cümhuriyyətinin, Milli Ordumuzun, Azərbaycan qadınına səsvermə hüququnun verilməsinin 100 illiyinin qeyd edilməsi də bu qəbildəndir. "Bildiyiniz kimi, bu il noyabrın 9-da Azərbaycan Dövlət Bayrağının təsis edilməsinin 100 ili tamam olur. Hesab edirəm ki, milli filateliya sərgisinin bu qürurlu tarixə həsr olunması onun əhəmiyyətini daha da artırır. Sərgi Azərbaycan Respublikasının Prezidenti İlham Əliyevin "Azərbaycan Xalq Cümhuriyyətinin 100 illik yubileyinin keçirilməsi" və "Azərbaycan Xalq Cümhuriyyəti İli" elan edilməsi haqqında müvafiq sərəncamlarına uyğun olaraq təşkil edilib. İnanıram ki, "BakıFilEkspo" V Milli Filateliya sərgisi də Azərbaycan filateliyasının, ümumiyyətlə kolleksiyaçılığın tarixində yeni mərhələ olacaq", – deyə nazir müavini diqqətə çatdırıb. Azərbaycan Filatelistlər İttifaqının sədr müavini Rövşən Əhmədov məlumat verib ki, sərgidə 7 nominasiyada müsabiqələrin keçirilməsi planlaşdırılır. Onun sözlərinə görə, ümumiyyətlə sərgidə bütün nominasiyalarda 19 kolleksiya, 34 çap işi nümayiş etdirilir. Bunlardan 4 toplu rəsmi dərəcədə, 20 çap işi müsabiqədən kənar dərəcədə, 8 toplu filateliya sinfində, 3 toplu filokartiya və filumeniya sinfində, 4 toplu numizmatika sinfində və 14 çap işi ədəbiyyat sinfində təqdim edilir. Müsabiqə dərəcəsində göstəriləcək 19 topludan 13-ü isə ilk dəfə nümayiş etdirilir. R.Əhmədov qeyd edib ki, milli filateliya sərgisində Azərbaycan dövlətçiliyinin önəmli səhifələrinə həsr olunmuş "Azərbaycan xanlıqlarının pul dövriyyəsi tarixi" adlı sikkə kolleksiyası da ilk dəfə nümayiş olunur. 300-ə qədər sikkədən ibarət olan kolleksiyada Gəncə, Şəki, Şirvan, İrəvan, Quba, Təbriz, Dərbənd və Qarabağ xanlıqları təmsil olunur. Sonra kolleksiyalara baxış keçirilib. Tədbirdə bir-birindən fərqli, nadir kolleksiyalar nümayiş etdirilib. Cümhuriyyət dövrünün poçt tarixi, SSRİ dönəmində Azərbaycana həsr olunmuş markalı zərflərin buraxılışı, 1992-2018-ci illərdə Azərbaycanda buraxılmış maraqlı poçt markaları və digər maraqlı kolleksiyalar böyük maraq doğurub. Sərgidə nəqliyyat, rabitə və yüksək texnologiyalar nazirinin müavini Elmir Vəlizadə ilə Dənizkənarı Bulvar İdarəsinin sədrinin müavini Elşən İsgəndərov Azərbaycan Dövlət Bayrağına həsr edilmiş poçt markasını xüsusi ştempellə möhürləyiblər. Filateliya sərgisində şəxsiləşdirilmiş poçt markaları bir neçə çeşiddə çap olunaraq iştirakçılara təqdim olunub. "Azərmarka" MMC və "Num.az" MMC-nin köşklərində filateliya və numizmatika üzrə materialların və aksesuarların da satışı təşkil edilib. V Milli Filateliya sərgisində nümayiş etdikləri kolleksiyalara görə, Nəqliyyat, Rabitə və Yüksək Texnologiyalar Nazirliyi "Azərmarka" MMC tərəfindən 7 nəfər xatirə qızıl medalı ilə, 5 nəfər xatirə gümüş medalı ilə, 5 nəfər xatirə bürünc medalı, 3 nəfər isə diplomla təltif olunub. Sərgi noyabrın 9-dək davam edəcək.

07-11-2018
Dənizkənarı Bulvar İdarəsi 9 Noyabr – Dövlət Bayrağı Gününə həsr olunan elmi-praktik konfrans keçirib

9 noyabr Dövlət Bayrağı Günü münasibətilə “Azərbaycan Respublikasının Dövlət bayrağı – 100 illik istiqlalımızın qürur mənbəyi” mövzusunda elmi-praktik konfrans keçirilib. Dənizkənarı Bulvar İdarəsinin Prezident yanında Dövlət İdarəçilik Akademiyası ilə birgə təşkil etdiyi tədbirdə Azərbaycan bayrağının mənəvi, siyasi və ideoloji əhəmiyyəti barədə fikir mübadiləsi aparılıb. Bulvar İdarəsinin Aparat rəhbəri, siyasi elmlər üzrə fəlsəfə doktoru Elmir Bağırov bildirib ki, Azərbaycan dövlət bayrağının 100 illik yubileyinə həsr olunmuş konfransın əsas məqsədi gənclər arasında vətənpərvərlik hisslərinin artırılmasına və dövlət rəmzlərinin təbliğinin gücləndirilməsinə töhfə verməkdir: “Azərbaycan bayrağı millətimizin və dövlətimizin simvoludur. Milli bayraq həm də dövlətimizin, bütövlükdə, xalqımızın gələcək yolunu müəyyənləşdirən bələdçidir. Milliliyi, dini inancımızı və müasirliyi təcəssüm etdirən bayrağımız azərbaycanlılara öz soykökünü xatırladır, üzərində dalğalanan torpağın qədimliyini göstərir. Bu gün ən yüksək zirvələrdə dalğalanan üçrəngli bayrağımız Azərbaycan dövlətinin gücünü və xalqımızın milli birliyini nümayiş etdirir” – Elmir Bağırov belə deyib. Elmi-praktik konfransda AMEA-nın müxbir üzvü,  Azərbaycan Milli Elmlər Akademiyasının Qafqazşünaslıq İnstitutunun  direktoru, professor Musa Qasımlı, Azərbaycan Respublikası Prezidenti yanında Dövlət İdarəçilik Akademiyasının tarix kafedrasının müdiri, dosent Firdovsiyyə Əhmədova, Azərbaycan Respublikasının Prezidenti yanında Dövlət İdarəçilik Akademiyasının professoru, Siyasi elmlər doktoru Elçin Əhmədov və digər qonaqlar məruzlərlə çıxış ediblər. Qeyd olunub ki, Azərbaycan Xalq Cümhuriyyətinin yadigarı olan bu bayraq bizim milli-mənəvi dəyərlərə, dövlətçilik ənənələrinə sadiqliyimizi nümayiş etdirir. Milli suverenliyimizin simvolu, ölkəmizin bütün vətəndaşları üçün müqəddəs dövlətçilik rəmzidir. Azərbaycan Xalq Cümhuriyyətinin süqutundan sonra ilk dəfə ümummilli lider Heydər Əliyevin rəhbərliyi ilə 1990-cı ildə Naxçıvanda əbədi yüksəkliyə qaldırılan üçrəngli bayrağımız müstəqil Azərbaycanın simvolu kimi bu gün dünyanın ən mötəbər beynəlxalq təşkilatları qarşısında dalğalanır. Tədbir Qara Qarayev adına Mərkəzi İncəsənət Məktəbi şagirdlərinin ifasında Bədii Kompozisiya ilə davam etdirilib.