09-07-2018
“Balaca YARAT” layihəsinin illik yekun sərgisi açılıb

“YARAT” Müasir İncəsənət Məkanı və Dənizkənarı Bulvar İdarəsinin dəstəyi ilə “Balaca YARAT” layihəsinin ilk yarımillik yekun sərgisi təqdim edilib. AZƏRTAC xəbər verir ki, “YARAT” Müasir İncəsənət Mərkəzində reallaşan layihə çərçivəsində uşaqlar tanınmış rəssamlar Aida Mahmudova və Mikelancelo Pislotelettonun fərdi sərgilərindən ilhamlanaraq müxtəlif sənət əsərləri yaradıblar. Sərgi zamanı layihənin ustadları Nərminə Bağırova və Nigar Quliyeva uşaqların əsərlərinin mövzuları, seçilmiş materiallar və texnikalar haqqında məlumat veriblər. Bir ay davam edəcək layihə müddətində uşaqlar Roman Qocayevin rəhbərlik etdiyi “Özünü tap” layihəsi haqqında da məlumatlanacaqlar. Uşaqlar sərgini gəzməklə yanaşı, müxtəlif interaktiv müsabiqələrdə iştirak edib hədiyyələr qazanacaqlar.

25-06-2018
Dənizkənarı Milli Parkda Yoqa festivalına start verilib

“YARAT” Müasir İncəsənət Mərkəzi Dənizkənarı Bulvar İdarəsi ilə birgə “YARAT Freestyle” proqramı çərçivəsində iyunun 24-də açıq havada genişmiqyaslı yoqa festivalına start verib. AZƏRTAC xəbər verir ki, Bayıl bulvarında reallaşan festivalın əsas məqsədi sağlam həyat tərzini təbliğ etməkdir. Gün ərzində müxtəlif tədbirlərin də təşkil olunacağı nəzərdə tutulur. Belə ki, Xəzər dənizi sahilində yaşıl qazon üzərində peşəkar müəllimlərlə birgə yoqa məşqləri, uşaqlar üçün ustad dərsləri, musiqiçilərin çıxışları, alovlu şou, “FLY yoqa” təşkil olunacaq, iştirakçılara sağlam qida veriləcək. Festival çərçivəsində gün boyu paytaxtın sakinləri və qonaqları üçün yoqanın müxtəlif istiqamətləri üzrə məşğələlər keçiriləcək, həmçinin yoqanın tarixi və sağlam həyat tərzi haqqında mühazirələr oxunacaq. Tədbirin əsas tərəfdaşlarından biri Hindistanın Azərbaycandakı səfirliyidir. Festivalın iştirakçıları “Yoqa Şahi” studiyası, “The Art of Living” meditasiya mərkəzi, Yoqa Akademiyası və Xalsa Mərkəzidir. Festival, eyni zamanda fəal istirahət mədəniyyətini təbliğ etmək, arzu edənlərin yoqanın müxtəlif istiqamətləri ilə tanış olmasına şərait yaratmaq, bu cərəyan haqqında ətraflı informasiya almaq məqsədi daşıyır. Qeyd edək ki, Beynəlxalq Yoqa Günü 2015-ci ildən başlayaraq dünyada geniş qeyd olunur. Yoqa Azərbaycanda da geniş yayılıb.

23-06-2018
Silahlı Qüvvələrin 100 illik yubileyi münasibətilə Bakıda hərbi mahnılardan ibarət konsert olub

Müdafiə Nazirliyinin Əlahiddə Nümunəvi Orkestri və Həzi Aslanov adına Mərkəzi Zabitlər Evinin yaradıcı kollektivi Silahlı Qüvvələrin 100 illik yubileyi münasibətilə iyunun 23-də Dənizkənarı Milli Parkda konsert proqramı ilə çıxış edib. AZƏRTAC xəbər verir ki, Əlahiddə Nümunəvi Orkestr və Mərkəzi Zabitlər Evinin yaradıcı kollektivi tərəfindən marşlar, hərbi və Vətənə həsr edilmiş mahnılar ifa olunub. Konsert şəhər sakinlərində və qonaqlarda yüksək əhval-ruhiyyə yaradıb.

15-06-2018
Açıq havada ənənəvi yoqa festivalı keçiriləcək

İyunun 24-də YARAT Dənizkənarı Bulvar İdarəsi ilə əməkdaşlıq çərçivəsində açıq səma altında bütün yoqa məktəb və mərkəzlərini yenidən bir araya gətirəcək. YARAT-dan AZƏRTAC-a bildiriblər ki, festivalda Yoqa Şahi studiyası, “The Art of Living” meditasiya mərkəzi, Yoqa Akademiyası və Xalsa Mərkəzi iştirak edəcək. Tədbirin əsas tərəfdaşlarından biri Hindistanın Azərbaycandakı səfirliyidir. Dənizkənarı Bulvarda, YARAT Mərkəzinin yaxınlığındakı çəmənlikdə keçiriləcək festival saat 09:00–dan 00:00-dək davam edəcək. Qeydiyyat iyunun 15, 16, 17-də saat 12:00-dan 22:00-dək, digər günlər isə saat 9:30-dan 18:00-dək aparılacaq. Yoqa dərsləri ilə yanaşı, qonaqları maraqlı proqram gözləyir. Bu proqramda hind rəqsləri üzrə kollektiv ustad dərsləri, canlı musiqi çıxışları və astroloji seanslar yer alacaq.

13-06-2018
Dənizkənarı Milli Parkda uşaqlar üçün futbol üzrə master-klass keçirilib

İyunun 12-də IDEA İctimai Birliyi, BMT-nin Azərbaycan nümayəndəliyi və Azərbaycan Futbol Federasiyaları Assosiasiyasının birgə təşkilatçılığı ilə Dənizkənarı Milli Parkda uşaqlar üçün futbol üzrə master-klass keçirilib. AZƏRTAC xəbər verir ki, tədbirin keçirilməsində əsas məqsəd gənclərin mənəvi və fiziki baxımdan sağlam yetişdirilməsi, sağlam həyat tərzinin təşviqi, gənclərin asudə vaxtlarının düzgün və səmərəli təşkili, həmçinin BMT-nin 2030 Dayanıqlı İnkişaf Məqsədləri ilə bağlı maarifləndirilmənin artırılması və ölkəmizdə aparılan idman siyasətinə dəstək olmaqdır. Milli yığma komandamızın futbolçuları Kamran Ağayev, Ruslan Qurbanov və Cavid İmamverdiyev tərəfindən keçilən ustad dərslərinə 30-a yaxın uşaq qoşulub. Millimizin oyunçuları master-klassın əvvəlində öz dəyərli məsləhətlərini uşaqlarla bölüşüb, peşəkar futbolçu olmaq üçün vacib olan amillərdən bəhs ediblər. Daha sonra qaytardıqları mükəmməl toplarla diqqətləri cəlb edən millimizin qapıçısı Kamran Ağayev gələcək həmkarları ilə öz təcrübələrini bölüşüb. Yığma komandamızın ən texnikalı oyunçularından olan yarımmüdafiəçi Cavid İmamverdiyev və öz həlledici qolları ilə azarkeşlərə sevinc bəxş edən hücumçu Ruslan Qurbanov uşaqların böyük marağına səbəb olan müəyyən fəndlər göstərib, onlara topla hərəkət texnikasının, driblinqlərin, ötürmələrin, həmçinin topu qaytarmaq məqsədilə tətbiq edilən pressinqlərin yaxşılaşdırılması yollarını nümayiş ediblər. Ustad dərslərinin yekununda “kiçik futbolçular” futbol üzrə Azərbaycan yığmasının oyunçuları ilə birgə futbol oynayıblar. Sonda master-klassa qoşulan uşaqlara BMT-nin 2030 Dayanıqlı İnkişaf Məqsədlərinin əks olunduğu toplar xatirə hədiyyələri qismində təqdim edilib.