14-05-2015
Turistlərin zövq alacağı məkan: Bakı buxtası, dəniz gəzintisi (FOTO)

Azərbaycan paytaxtının sakinləri və qonaqlarının ən sevimli əyləncələrindən biri Bakı buxtası akvatoriyasında, Dənizkənarı Milli Parkda dəniz gəzintisidir. 650 nəfər üçün hesablanmış üçyaruslu katerdə böyüklər üçün biletin qiyməti 3 manat, beş yaşınadək uşaqlar üçün isə pulsuzdur. Katerin ilk iki mərtəbəsində iki qapalı məkan var, sonuncu - üçüncü yarus isə açıqdır və burada sərnişinlərin Bakının mənzərəsindən zövq almaq imkanı var. Katerin göyərtəsində sərnişinlərə çay, kofe, sərinləşdirici içkilər, eləcə də "fast food" təklif edilir. Səyahət zamanı katerdə musiqi dinləmək, videoya baxmaq, pulsuz Wi-Fi-dan istifadə etmək mümkündür. Gəzintinin müddəti 40-50 dəqiqədir. Hazırda Bakı bulvarının uzunluğu 6 kilometrdir, lakin tezliklə 15 kilometrədək artırılacaq və katerlər Dənizkənarı Milli Parkın bütün sahil zolağı boyunca hərəkət edəcək.

06-08-2014
Bakının Dənizkənarı Milli Parkı bundan sonra mütəmadi dezinfeksiya olunacaq

Bakının Dənizkənarı Milli Parkında infeksion xəstəliklərin yayılmasına qarşı ciddi tədbirlər görülür. Bu barədə Trend-ə açıqlamasında Dənizkənarı Bulvar İdarəsinin Dövlət Bayrağının təbliği və beynəlxalq əməkdaşlıq şöbəsinin müdiri Nazim Məcidov bildirib. Onun sözlərinə görə, əvvəlki illərdən fərqli olaraq bu il bütün iaşə obyektləri, attraksionlar, karusellər, oturacaqlar, yaşıllıq sahələri, sahil boyu məhəccərlər, eləcə də yaşıllıqlar dezinfeksiya olunub: "Bu miqyasda işlər ilk dəfədir ki, görülür. Bu işlər profilaktik xarakterlidir və hər hansı ciddi zərurətdən irəli gəlmir. Dünyanın bir çox yerində müəyyən xəstəliklərin yayılması müşahidə olunur. Bizim Milli Parkımız nəinki Azərbaycan vətəndaşların, eləcə də ölkəmizə gələn qonaqların, turistlərin ən çox sevdiyi, istirahət etdiyi məkanlardan biridir. Ona görə də biz də çalışırıq ki, insanların rahatlığı, yüksək səviyyədə istirahəti üçün daha çox zəmin, daha yaxşı şərait yaransın". N.Məcidov qeyd edib ki, dezinfeksiya işləri yay mövsümü ərzində hər 15 gündən bir aparılacaq. Çünki istifadə edilən dərman preparatlarının təsir müddəti 15 gündür. Qış mövsümündə isə bu işlər 1-2 aydan bir aparılacaq.