Azərbaycan Respublikasının Baş naziri Əli Əsədovun sədrliyi ilə yanvarın 27-də Nazirlər Kabinetində “Xəzər dənizində müxtəlif təyinatlı qəzalı və yararsız vəziyyətdə olan hidrotexniki qurğuların, o cümlədən qəzalı vəziyyətdə olan və ləğv olunmuş quyuların təkrar ləğvi və izolyasiyası, estakadaların, yanalma körpülərinin, platformaların, həmçinin batmış və yarımbatmış vəziyyətdə olan gəmilərin çıxarılması və digər reabilitasiya işlərinin həyata keçirilməsinə dair 2025–2030-cu illər üçün Kompleks Tədbirlər Planı”nın icrası və Bakı buxtasının ekoloji vəziyyətinin yaxşılaşdırılması məsələlərinə həsr olunmuş iclas keçirilib.

Baş nazir Əli Əsədov çıxışında Xəzər dənizində köhnəlmiş hidrotexniki qurğuların, eləcə də uzunmüddətli antropogen təsirlərin Bakı buxtasında, o cümlədən Dənizkənarı bulvar akvatoriyasında çirklənməni dərinləşdirdiyini qeyd edərək, ekoloji vəziyyətin yaxşılaşdırılmasının vacibliyini vurğulayıb.